१९ श्रावण ,रौतहट
रौतहटको सात वटा स्थानीय तहको बजेट पारित हुन नसक्दा कार्यक्रम प्रभाबित भएको छ । तोकिएको समयमा तीन नगरपालिकाले बजेट ल्याउन सकेन भने पेश भएर पनि चार वटा नगरपालिकाको बजेट पारित हुन नसकेको संघीय मामिला तथा सामान्य प्रशासन मन्त्रालयले जनाएको छ । मन्त्रालयका अनुसार रौतहटको गरुडा नगरपालिका, वृन्दावन नगरपालिका र देवाही–गोनाही नगरपालिकाले तोकिएको समयमा बजेट ल्याउन सकेनन् भने ईशनाथ नगरपालिका, फतुवा विजयपुर नगरपालिका र बौधीमाई नगरपालिकामा पेश भए पनि बजेट पारित गर्न नसकेको हो । चालु आर्थिक वर्ष २०७८÷७९ को लागि स्थानीय तहले बजेट ल्याउनु पर्ने हो ।
चालु आर्थीक बर्षको लागि अघिल्लो बर्षको असाढ १० गते नगरसभा गरिसक्नु पर्ने संबैधानिक ब्यबस्था रहेको छ । अन्तरसरकारी वित्त व्यवस्थापन ऐन २०७४ अनुसार स्थानीय तहले असार १० गते भित्र बजेट ल्याउनुपर्ने र साउन लाग्नुअगावै पास गरिसक्नुपर्ने कानूनी व्यवस्था छ । असार १० गते बजेट ल्याउन नसके पनि असार महिना सकिनुभन्दा अघिनै सभाबाट बजेट पास गरिसक्नुपर्नेमा रौतहटको गरुडा नगरपालिका, वृन्दावन नगरपालिका, देवाही–गोनाही नगरपालिका, ईशनाथ नगरपालिका, फतुवा विजयपुर नगरपालिका र बौधीमाई नगरपालिकाले अझै बजेट पारित गर्न सकेको छैन । बजेट पारित नभएपछि ती स्थानीय तहले साउनदेखि बजेट कार्यान्वयन गर्न सकेका छैनन । नगरसभा बाट बजेट पारित नभएपछि नयाँ आर्थिक वर्षका लागि सञ्चित कोषबाट रकम खर्च गर्न नमिल्दा कार्यक्रम प्रभाबित हुदै आएको छ । यस आर्थीक बर्षको बजेट स्थानीय जनप्रतिनिधिहरुको कार्यकालको अन्तिम बजेट रहेको छ ।
